वर्षा कुंभार: खानापूर
देशभरातील बँक ग्राहकांसाठी सप्टेंबरअखेर महत्त्वाची घडामोड समोर आली आहे. युनायटेड फोरम ऑफ बँक युनियन्सने (UFBU) २८ ते ३० सप्टेंबर २०२६ या कालावधीत देशव्यापी तीन दिवसांच्या संपाची हाक दिली आहे. त्यापूर्वी २६ सप्टेंबरला चौथा शनिवार आणि २७ सप्टेंबरला रविवार असल्याने बँकांच्या प्रत्यक्ष शाखा सेवांवर सलग अनेक दिवस परिणाम होण्याची शक्यता आहे.
म्हणून रविवारी बँका उघडणार!
ग्राहकांची गैरसोय कमी करण्यासाठी केंद्र सरकारने महत्त्वाचा निर्णय घेतला आहे. २७ सप्टेंबर, रविवार रोजी सार्वजनिक क्षेत्रातील बँका आणि प्रादेशिक ग्रामीण बँका सामान्यपणे सुरू ठेवण्यात येणार आहेत. RBI ने बँक शाखा, कार्यालये, ATM-linked शाखा आणि Currency Chests सुरू ठेवण्यास मंजुरी दिली आहे.
संपामागे नेमक्या कोणत्या मागण्या?
बँक कर्मचाऱ्यांच्या संघटनांकडून पाच दिवसांचा बँकिंग आठवडा लागू करावा, ही प्रमुख मागणी करण्यात आली आहे. त्यासोबतच कर्मचारी भरती वाढवणे, नोकरीची सुरक्षितता, पेन्शनसह विविध सेवा-संबंधित मागण्यांवरही संघटनांनी भूमिका घेतली आहे.
३० सप्टेंबरचा दिवस महत्त्वाचा
३० सप्टेंबर हा आर्थिक वर्षातील अर्धवार्षिक कामकाजाच्या दृष्टीने महत्त्वाचा दिवस असल्याने त्या दिवशी संप झाल्यास बँकांच्या नियमित कामकाजावर परिणाम होण्याची शक्यता आहे. त्यामुळे ग्राहकांनी महत्त्वाचे शाखास्तरीय व्यवहार आधीच पूर्ण करण्याचा सल्ला दिला जात आहे.
ग्राहकांनी काय करावे?
महत्त्वाचे रोख व्यवहार, धनादेश, कागदपत्रांशी संबंधित कामे आणि इतर शाखा-आधारित व्यवहार शक्यतो २७ सप्टेंबरपूर्वी किंवा रविवारी उपलब्ध सेवेदरम्यान पूर्ण करणे सोयीचे ठरेल.
संपाच्या काळात UPI, इंटरनेट बँकिंग, मोबाईल बँकिंग, IMPS आणि ATM यांसारख्या डिजिटल सेवा सुरू राहण्याची अपेक्षा आहे. मात्र शाखेत होणारे काही प्रत्यक्ष व्यवहार आणि चेक क्लिअरिंगसारख्या सेवांवर परिणाम होऊ शकतो.
थोडक्यात :
२६ सप्टेंबर : चौथा शनिवार — बँक सुट्टी
– २७ सप्टेंबर : सार्वजनिक क्षेत्रातील व प्रादेशिक ग्रामीण बँका सुरू
– २८ ते ३० सप्टेंबर : UFBUचा प्रस्तावित देशव्यापी संप
– ATM/UPI/मोबाईल बँकिंग : डिजिटल सेवा सुरू राहण्याची अपेक्षा
– ग्राहकांसाठी सूचना : महत्त्वाचे शाखा व्यवहार आधीच पूर्ण करा.
Advertise…..
Advertise
