सिंधुदुर्ग मधील सतीचेवाडी येथील चिरेखाणीत पोहताना अंदाज चुकल्याने ५० वर्षीय पर्यटकाचा जीव गेला; रेस्क्यू टीमच्या मदतीने मृतदेह बाहेर काढण्यात यश
आंबोली| प्रतिनिधी: श्री. स्वप्निल कुंभार.
पर्यटनासाठी प्रसिद्ध असलेल्या आंबोली परिसरात रविवारी सर्पदंशाने पर्यटकाचा मृत्यू झाल्याची घटना ताजी असतानाच सोमवारी आणखी एका पर्यटकाचा बुडून मृत्यू झाल्याने परिसरात हळहळ व्यक्त होत आहे. सतीचेवाडी येथील चिरेखाणीत पोहण्यासाठी उतरलेल्या ५० वर्षीय पर्यटकाचा पाण्यात बुडून दुर्दैवी अंत झाला.
मृत व्यक्तीचे नाव संजय लक्ष्मण गावंकर (वय ५०, रा. इस्लामपूर) असे आहे. मिळालेल्या माहितीनुसार, माजगाव, उदयनगर येथील ‘हिंदुस्थान पॉलीमर्स’ कंपनीतील काही कर्मचारी माजगाव आणि इस्लामपूर परिसरातून आंबोलीत पर्यटनासाठी आले होते. सोमवारी दुपारी साडेतीनच्या सुमारास हा समूह सतीचेवाडी येथील चिरेखाणीजवळ पोहोचला.
चिरेखाणीच्या पाण्यात पोहण्यासाठी उतरल्यानंतर संजय गावंकर यांचा पाण्याचा अंदाज चुकला आणि ते खोल पाण्यात बुडाले. ही बाब लक्षात येताच त्यांच्या सहकाऱ्यांनी तातडीने मदतीसाठी धाव घेतली. घटनेची माहिती माजी सरपंच शशिकांत गाडगे यांनी रेस्क्यू टीम आणि आंबोली पोलिसांना दिली.
माहिती मिळताच सह्याद्री अॅडव्हेंचर आंबोली आणि सांगली रेस्क्यू टीम घटनास्थळी दाखल झाली. रेस्क्यू टीमच्या सदस्यांनी पाण्यात शोधमोहीम राबवत संजय गावंकर यांचा मृतदेह बाहेर काढला. या बचावकार्यात अजित नावेकर यांच्यासह राजू राऊळ, उत्तम नावेकर, नारायण चव्हाण, दीपक मेस्त्री, सुजित नायर, प्रथमेश गाडगे, कमलेश गाडगे, गिरीश गाडगे आणि विराज गाडगे यांनी महत्त्वाची भूमिका बजावली.
घटनेची माहिती मिळताच आंबोली पोलिस ठाण्याचे हवालदार लक्ष्मण काळे घटनास्थळी पोहोचले. त्यांनी घटनास्थळाचा पंचनामा करून पुढील तपासाची प्रक्रिया सुरू केली आहे.
पर्यटनस्थळी सुरक्षेचा प्रश्न पुन्हा ऐरणीवर
आंबोलीसारख्या निसर्गरम्य पर्यटनस्थळी धबधबे, चिरेखाणी, तलाव आणि जलसाठ्यांकडे पर्यटक मोठ्या संख्येने आकर्षित होतात. मात्र अशा ठिकाणी पाण्याची खोली, प्रवाह आणि तळाची रचना यांचा अंदाज येणे अनेकदा कठीण असते. त्यामुळे केवळ पोहता येते म्हणून अनोळखी जलसाठ्यात उतरणे धोकादायक ठरू शकते. सलग दोन दिवसांत आंबोली परिसरात पर्यटकांच्या मृत्यूच्या घटना घडल्याने पर्यटनासोबतच सुरक्षेलाही प्राधान्य देण्याची गरज अधोरेखित झाली आहे.
